ETICA Prepara Graduasaun ba Estudante 151 Tinan Ida Ne'e

    Gleno - East Timor Coffee Academy (ETICA) hanesan instituisaun ida ne’e hari husi intelektual Ermera oan, estabelese iha loron 17 fulan Maio 2003, hodi hetan suporta husi USAID – NCBA, no sai hanesan Fundasaun maka LAHER (Letefoto, Atsabe, Hatolia, Ermera no Railaco), to oras ne’e ETICA produs ona estudante lobuk no ETICA mos hetan ona akreditasaun husi Governo liu husi Ministerio Educasaun.

         East Timor Coffee Academy (ETICA) oras ne’e dadaun halao hela preparasaun atu fo graduasaun  ba dala II iha fulan Setembru tinan ida ne’e.

         Actividade nebe Estudante no Graduadu sira halo mak hanesan, Prepara fatin ba Graduasaun, Tenda, no preparasaun seluk nebe Instituisaun refere halo maka prepara konvite no kordena ho Governo, liliu Ministerio Educasaun atu hasai karta despaixu

      Tuir Inervista badak nebe Jornalista halo ho Diretur  ETICA Moizes dos Reis Borromeu, SP. Hateten katak Graduasaun ida ne’e halo ba dala II, nebe Graduasaun primeiru halao iha 23 Janeiro 2009, ba estudante 49 komposto husi departementu 4, Hanesan Agrobisnis, Floresta, Agronomia, no departementu Agro Comersio, maibe preparasaun ba dia 1 Setembro agora sei gradua husi estudante 151, nebe mai husi departementu 5, hanesan Agrobisnis, Floresta, Agronomia, Horticultura,  no departementu Agro Comersio.

        Direktur ne’e  mos realsa liu tan katak tuir Planu nebe ETICA prepara hanesan distribuisaun Konvite ho target 1500, nebe bainaka husi rai liur  maka  Universidade sira husi Indonesia, hanesan Brawijaya, IPB, no Biotrop, Portugal maka Universidade EVORA, no Australia maka Universidade Petter cross. Tuir planu sei  konvida mos Primeru  Ministru RDTL, Ministro Educasaun, Presidente da Republica, Universidade hotu iha Timor laran tomak, no entidade relevante seluk,  Autoridade local Distrito Ermera, PNTL, Igreja, Lider komunitario no Intelektual Ermera oan, inklui mos Fundador  ETICA no Fundasaun LAHER , Borromeu Salienta.

          Asuntu seluk maka Diretur ne’e hateten katak ho Graduasaun ne’e mos Instituisaun ne’e  muda naran husi ETICA ba ETCI (East Timor Coffee Academy / East Timor Coffe Institut) ho rajaun katak tuir Ensinu Superior Educasaun nian Academy bele fo deit Diploma I – II, maibe ETICA fo graduasaun ho Diploma III, tamba ne’e maka Agencia Acreditasaun no Ensinu Superior sujere atu muda naran  ETICA ba ETCI, kona ba criteria seluk ETICA laiha problema no sai ona akreditasaun husi Ministerio Educasaun.

          Intervista Ikus maka Diretur  ne’e  hatutan katak, Estudante nebe atu simu graduasaun hamutuk 151, maibe balun sedauk Rejistu, tamba ne’e ETICA sei loke registrasaun ba to iha dia 25 de Agusto, se to data ne’e maka balun la registu,  ne’e signifika katak sira la tama ba graduasaun ida ne’e.

       Tuir horario Graduasaun katak sei realisa iha dia 1 de Setembro, maibe dalaruma mos sei bele muda fali ba oin, tamba sei hein despaixu husi Ministerio Educasaun, hodi publika naran graduante sira liu husi Jornal da republica, tamba tempu maka limitadu liu atu prosesa despaixu, tamba ne’e diretur  ne’e hateten katak karik despaixu sai lalais entaun bele realisa iha dia 1 setembro, maibe despaixu tarde maka sei adia tan ba loron 4 ka 5.  To notisia ne hatun  data Graduasaun seidauk positive,  hodi  hein despaixo husi Ministerio educasaun ensinu Superior , ho nune ne’e ami sei hatun redaksaun iha edisaun tuir mai, tamba oportunidade graduasaun ne’e  mos ETICA sei deklara ba publiku katak ETICA muda ona ba ETCI. (UMR Ermera)